خوایە بمانکە بە کەسێک کە خۆی چاک بکات، هێز و وزەی ئەوەشمان پێبدە کە خەڵکیش چاک بکەین، بانگیان بکەین بۆ ڕاستی و جوانی و تەوحید!
خوایە لە مەجلیسی کەسانی کەم عەقڵ دوورمان بخەوە، ئەو مەجلیسانەمان پێ ببەخشە کە تەقوا و ئیمانمان زیاد دەکات، عەقیدەکەمان دروست و تەواو و پاڵفتە بکات!
خوایە بمانکە بازرگانێکی سەرکەوتوو بۆ قیامەتمان، دڵمان وەرگێڕە بۆ هەوڵدان بۆ قیامەت، دونیا و خۆشیەکانمان لا بچوک بکەوە، پلە بەرزەکانمان پێببەخشە!
خوایە بارانی خۆشی و شیفا و رەحمەت بڕژێنە سەر ژیانمان، دوورمان بخەوە لە زەحمەتی و ناخۆشی و ئازارەکان، درەختی ئیمان و تەوحید و تەقوا بڕوێنە لە ناخمان، خۆشەویستی خۆتمان پێببەخشە!
ئەی خاوەن دەسەڵاتی باڵا، هەموو زەحمەتی و ناخۆشیەکانمان بۆ بکە بە ئاسانی، نەخۆشیەکان بە چاکبوونەوە، تاریکیەکان بە رووناکی، لە کۆت و زنجیری نەفس و هەواو و شەیتان رزگارمان بکە، بمانخە ژێر سایەی بەندایەتیکردن و گوێڕایەڵی خۆت!
ئەی خاوەن ئەوپەڕی سۆز و رەحمەت، بەزەییت بێتەوە بە حاڵمان، رەحممان پێبکە، فێری رەحممان بکە، ناومان بنوسە بە یەکێک لەوانەی بۆ هەمیشە سەرفرازن، بمانکە لە یەکێک لە نیشتەجێبوانی بەهەشتەکانی خۆت، بۆ هەمیشە لای تۆ بحەسێینەوە!
خوایە تەقوا بە دڵمان ببەخشە، پاکی بکەوە، تۆ باشترینی ئەو زاتەی کە دڵەکان پاک دەکەیەوە، دۆستایەتی خۆتمان پێببەخشە!
Comments
Post a Comment