خوایە دڵمان دەوڵەمەند بکە، قەناعەتمان پێببەخشە، بەخشین و یارمەتیدانی خەڵکیمان لا خۆشەویست و ئاسان بکە، لە هەژاری دڵ بمانپارێزە، بمانکە سوارچاکی بەخشین و فێرکردنی زانست بۆ دەوروبەرمان!
خوایە فێری بازرگانیەکی پڕ لە قازانجمان بکە بۆ قیامەت، ناخۆشیەکانی قیامەتمان لەسەر سووک بکە، ئازارەکانی دونیامان بۆ بکە هەڵوەرینی گوناهەکانمان، خۆشیەکانمان بۆ بکە وەرزی بەهار و ژیانەوە!
خوایە بەرچاوڕۆشنیمان پێببەخشە، بۆ دین و دونیامان، بمانکە کەسێک کە هەستێکی باشتر و زیرەکیەکی باڵاترمان هەبێ، لە وونبوونی ڕێگای راست پارێزراومان بکە!
خوایە ئەو رزقانەمان پێببەخشە کە بۆ دڵمان سوودبەخشن، قیامەتمان بۆ ئاوەدان دەکەنەوە، گوناهەکانمان دەسڕنەوە، بەزەیی خۆتمان لەسەر فراوان دەکات!
ئەی خاوەن دەسەڵات، هێزی شەیتان و نەفس لە دڵمان لاواز بکە، خامۆشی بکە، ئیخلاس بڕوێنە لە ناخمان، بیرکردنەوەی دروستمان پێبدە، وزەی تەواومان پێببەخشە کە بە خۆشەویستیەوە سوژدەت بۆ ببەین!
خوایە پەرستن لە دڵمان خۆشەویست بکە، تەقوامان بۆ زیاد بکە، هەق و ناهەقمان بۆ جیابکەوە، کارەکانمان بۆ ئاسان بکە، چەوتیەکانمان بۆ ڕاست بکەوە!
Comments
Post a Comment